Stadtfreiungsurkunde von Simmern vom 10. Juli 1330:
Wir Ludowich von Gots gnaden Römischer cheiser, ze allen zeiten merer dez Reichs, tun chunt allen den, di disen brief ansehent oder horent lesen, daz wir dem Edeln manne Jorgen dem Ruchgrauen, unserm lieben getrewn und sinen Erben, durch der dienst willen, di er uns und dem Reich getan hat und noch tun sol und mag, bestetigt haben und besteten von cheiserlichem gewalt die vreiunge der Stat Alten Symmern und den Wochen Margt daselbs, als wir si in vor geben und erlaubt haben nach rechten und vreiheit unser und des Reichs Stat Poparten, darzu von besunder gnaden haben wir in erlaubt, einen Jarmargt doselbs ze Alten Symmern jarichlich ze halten, der anheben sol an Sani Bartholomeus Abent und weren acht tag. Und do von wollen wir und gebieten allen unsern und dez Reichs getruwen, sowie di genant sint, vestichlich bei unsern hulden, daz si dise unser gnad staet haben und den vorgenannten Ruchgrauen und sein Erben daran nicht irren noch besweren. Wer si aber dar uber beswert, wellen wir, daz der geben und gelten sol funftzig pfunt goldes, die halb in unser Chamer gevallen sullen und halb dem obgenanten Ruchgrauen und seinen Erben. Und dar uber ze urchundt geben wir disen brief mit unserm Cheiserlichen Insigel versigelten. Der geben ist ze Weyzenburch, dez Dynstags vor Sani Margrethen tag, do man zalt von Christes geburdt dreitzehen Hundert Jar dar nach in dem dreytzigestem Jar, in dem sechtzehenden jar unsers Reichs und in dem dritten dez Cheisertums.